Deputeti i LDK-së, Avdullah Hoti, e ka kritikuar kryeministrin e Kosovës, Albin Kurti, për vizitat e tij jashtë vendit.
Hoti në reagimin e tij ka thënë se përkundër që ShBA-ja ua ndaloi vizitat në këtë vend ministrave të Qeverisë së Kosovës, Kurti me qëllim sipas tij po e kalon kohën më shumë jashtë se në Kosovë.
Ish-kryeministri i Kosovës e ka kritikuar Kurtin edhe për çështjen e targave, duke thënë se nuk po i dëgjon kërkesat e ShBA-së.
“ShBA-ja iu ndërpreu vizitat ministrave për shkak të gjendjes në vend. Ndërsa, Kryeministri, për t’i dhënë mesazh SHBA-së, rri më shumë jashtë se në Kosovë. Vendimin për targat nuk e ndryshon sipas kërkesës së SHBA-së, se jemi vend sovran. Por Drejtorin e Policisë dhe Drejtorin e Operacioneve i dërgon te Shefi i EULEX-it për t’u koordinuar për çështje të sigurisë?!”, ka shkruar Hoti.
Ndryshe, kryeministri i Kosovës, Albin Kurti, ka udhëtuar për vizitë zyrtare në shtetin e Estonisë.
Kurti pritet të takohet nga kryeministri i Estonisë, Kaja Kallas dhe po ashtu siç njofton Zyra e Kryeministrit, do të ketë takime me përfaqësues të tjerë të këtij shteti.
“Kryeministri i Republikës së Kosovës, Albin Kurti ka udhëtuar për vizitë zyrtare në Estoni. Nesër do të pritet në takim nga Kryeministrja e Republikës së Estonisë, Kaja Kallas, dhe do të ketë takime me përfaqësues të tjerë të lartë shtetëror”, thuhet në njoftimin e Zyres së Kryeministrit.
Me ftesë të presidentit francez, Emmanuel Macron, më 10 nëntor kryeministri Albin Kurti, kishte udhëtuar në Paris të Francës, ku kishte marrë pjesë në Forumin e Paqes.
Më pas, Kurti e kishte vizituar Austrinë dhe së fundmi edhe Gjermaninë. Vlen të theksohet se ambasadori i ShBA-së, në Kosovës, Jeff Hovenier, kishte deklaruar se nuk është koha që zyrtarët e pushtetit të udhëtojnë jashtë vendit në kohën e krizës në veri.