Ambasadori i ShBA-së në Kosovë, Jefrey Hovenier, ritheksoi se zgjedhjet në katër komunat e veriut ishin ligjore, por sipas tij, asnjë nga kryetarët e rinj nuk mund të pretendojë për një mandat të fortë apo mbështetje nga popullata shumicë serbe në ato komuna.
Po ashtu, ai ritheksoi se kryetarët duhet të kenë rol teknik administrativ.
“Askush nuk duhet të jetë i kënaqur me zgjedhje që rezulton me më pak se 4 për qind të pjesëmarrjes së votuesve në votime. Zgjedhjet ishin ligjore dhe kishte një proces ligjor të kërkuar dhe ne nuk e kontestojmë këtë, por mendoj se është me rëndësi ta kemi në mendje, siç e thashë më parë, dhe këtë e tha edhe QUINT në kumtesën e javës së kaluar, duhet të jemi të kujdesshëm me atë çfarë ndodhi këtu”, tha ai.
“Asnjëri nga këta zyrtarë nuk do të mund të pohojë një mandat të fortë apo një mbështetje të fuqishme nga popullata për të cilën tani janë përgjegjës dhe kanë përgjegjësi për të administruar për shkak të pjesëmarrjes së vogël të votuesve. Pra, porosia gjatë gjithë këtij procesi ishte, ne i kemi inkurajuar vazhdimisht që të bëjnë punën në përputhje me ligjin, por të jeni të mençur politikisht. Tani kemi katër kryetarë, një ka marrë detyrën dhe tre të tjerë duhet ta bëjnë këtë. Porosia jonë për kryetarët, dhe kjo nuk është sekrete, se ata duhet ta konsiderojnë veten më shumë në rolin administrativ teknik”, ka vijuar ai.
Tutje, ai tha se asnjë nga kryetarët e zgjedhur nuk do të jetë i gëzuar me vetëm 4% të daljes së votuesve.
Ai tha se u kanë sugjeruar atyre që të mos ndërmarrin veprime që do të bënin ndryshime madhore.
“Por është punë politike, megjithatë realiteti është ashtu siç e thash s’e besoj se asnjë prej kryetarëve nuk do të jetë i lumtur me 4 për qind, apo në disa raste në komuna të tjera më specifike, me 5 për qind të votuesve të mundshëm aktualisht dolën për të votuar. Ne i kemi inkurajuar ata që ta bëjnë punën e tyre siç kërkohet me ligj, të ofrojnë shërbime për qytetarët, të jenë kryetarë për të gjithë qytetarët, por gjithashtu të mos ndërmarrin veprime që do të sugjeronin se ata kanë mandat që mund të bëjnë ndryshime madhore, të ndërmarrin nisma të re”, ka thënë ai.
Ambasadori Hovenier i ka këshilluar kryetarët e komunave të veriut që të mos i përmbahen orarit për betim në ndonjë vend ku do t’u duhet ta përdorin forcën për të siguruar qasje.