Ambasadori i Shteteve të Bashkuara të Amerikës (SHBA), Jeff Hovenier, u ka uruar festën e Kurban Bajramit të gjithë besimtarëve në Kosovë dhe më gjerë.
Me anë të një postimi në Twitter, Hovenier ka nisur urimet e tij.
“Dërgoj urimet më të ngrohta me rastin e Kurban Bajramit për të gjithë ata që festojnë në Kosovë dhe në mbarë botën!”, ka shkruar Hovenier.
Sending warmest greetings on the occasion of Eid al-Adha (Kurban Bajram) to everyone celebrating in #Kosovo and across the world! pic.twitter.com/LKhI1yDg3k
— Ambassador Jeff Hovenier (@USAmbKosovo) June 28, 2023
Urimet në këtë festë nuk munguan as nga ambasadori i Britanisë së Madhe, Nicholas Abbott.
“Ju uroj të gjithë myslimanëve në Kosovë dhe më gjerë në botë, gëzuar Kurban Bajramin. Kjo festë le t’ju sjellë shëndet, paqe dhe prosperitet, juve dhe familjeve tuaja”, ka shkruar Abbott në Facebook.
I wish all Muslims celebrating today in Kosovo and around the world, a happy Eid al-Adha. May this holiday bring to you and your families health, peace and prosperity. pic.twitter.com/PY8Z6dfDxU
— Nicholas Abbott (@nickabbottfcdo) June 28, 2023
Mëngjesin e hershëm të së mërkurës është falur namazi i Kurban Bajramit në të gjitha xhamitë e Kosovës.
Manifestimi ka filluar me faljen e namazit të sabahut, pas të cilit kanë filluar ligjërata tematike kushtuar kësaj feste të shenjtë të Islamit.
Namazi i Kurban Bajramit është falur në orën 05:38 të mëngjesit.
Kurban Bajrami përkujton kohën kur profeti Ibrahim pa një ëndërr, për të cilën ai besonte se ishte një mesazh nga Allahu që i kërkonte të sakrifikonte djalin e tij Ismailin si një akt bindjeje ndaj Zotit.
Djalli e tundoi Ibrahimin duke i thënë se ai duhet ta kundërshtojë Allahun dhe ta kursejë djalin e tij. Ndërsa Ibrahimi, sipas fesë islame, ishte gati ta vriste djalin dhe në atë moment Allahu e ndaloi dhe në vend të tij i dha një qengj për kurban.
Bajrami fillon me shkuarjen e myslimanëve në xhami për falje, dhe për ta falënderuar Allahun për të gjitha bekimet që kanë marrë.
Është një kohë kur ata vizitojnë familjen dhe miqtë. Myslimanët gjithashtu duhet të japin para për bamirësi në mënyrë që edhe të varfërit të festojnë.