Ambasadori i Shteteve të Bashkuara të Amerikës (ShBA) në Kosovë, Jeff Hovenier ka theksuar se partneriteti i ShBA-së me Kosovën është i fortë.
Këtë deklaratë Hovenier e ka bërë pas vizitës së këshilltarit amerikan, Derek Chollet të mërkurën në Kosovë.
“Kënaqësi të mirëprisja Derek Chollet dje në Kosovë. Partneriteti ynë me Kosovën është i fortë. Ndërsa ishte këtu, këshilltari Chollet u angazhua me një shumëllojshmëri të gjerë liderësh, përfaqësues të qeverisë dhe shoqërisë civile dhe gazetarëve”, ka shkruar Hovenier.
Pleased to welcome @CounselorDOS to Kosovo yesterday. Our partnership with 🇽🇰 is strong. While here, Counselor Chollet engaged with a wide variety of leaders, government and civil society representatives, and journalists. https://t.co/xj3KMO9k95
— Ambassador Jeff Hovenier (@USAmbKosovo) January 12, 2023
Ndryshe, të mërkurën e 11 janarit, këshilltari i lartë i Departamentit amerikan të Shtetit, Derek Chollet ishte për vizitë zyrtare në Kosovë.
Këshilltari Chollet pas takimit me presidenten e Kosovës, Vjosa Osmani dhe kryeministrin Albin Kurti ka thënë se “partneriteti ShBA – Kosovë është i palëkundur”.
Pas takimit edhe me krerët opozitarë, si dhe me anëtarët e Listës Serbe, ai para gazetarëve ka thënë se “Kosova duhet të përmbushë të gjitha zotimet në kuadër të dialogut, përfshirë edhe formimin e Asociacionit të komunave me shumicë serbe” dhe se presin nga “Qeveria e Kosovës të vendosë disa propozime në tryezë”.