Ambasadori i Shteteve të Bashkuara të Amerikës (ShBA) në Kosovë, Jeffrey Hovenier, ka thënë se pret implementimin e plotë të Marrëveshjes së Ohrit në mes të Kosovës dhe Serbisë.
Hovenier, në një prononcim të shkurtër para mediave të hënën, ka deklaruar se dje kanë dhënë qëndrimin për zgjedhjet në katër komunat veriore.
Aty theksohet se qëndrimi i ShBA-së për zgjedhjet e jashtëzakonshme në Mitrovicën e Veriut, Leposaviq, Zubin Potok dhe Zveçan, ishin në përputhje me kërkesat kushtetuese dhe ligjore të Kosovës.
“Dje e kemi dhënë një qëndrim, aty theksohet nevoja për implementimin e plotë të marrëveshjes së Ohrit dhe këtë e presim”, tha ai, transmeton KP.
Këtë koment, Hovenier e bëri pas pjesëmarrjes në nënshkrimin e disa marrëveshjeve të mirëkuptimit ndërmjet Universitetit të Iowa-s dhe disa universiteteve publike në Kosovë për nisjen e aktivitetit të mbështetur nga USAID-i të partneritetit me sektorin privat për forcimin e arsimit të lartë.