Organizatorët e platformës “Liria ka Emër”, Eliza Hoxha dhe Ismail Tasholli, kanë thënë se qytetarët e Kosovës kanë dëshmuar edhe një herë mbështetjen e tyre për Ushtrinë Çlirimtare të Kosovës dhe ish-krerët e saj që po gjykohen në Hagë.
Duke iu drejtuar mijëra pjesëmarrësve në sheshin “Skënderbeu” në Prishtinë, Hoxha kujtoi “Marshin e Lirisë” të vitit 1999, kur pjesëtarët e UÇK-së marshuan nëpër qytetet e Kosovës pas demilitarizimit, për të festuar lirinë së bashku me qytetarët.
Ajo tha se 27 vjet më vonë, qytetarët po marshojnë sërish për liri, por këtë herë për lirinë e atyre që, sipas saj, e sollën lirinë e Kosovës.
“Sot marshojmë me UÇK-në, për UÇK-në, sepse UÇK na bashkon, na ka bashkuar dikur, na bashkon edhe sot, na bashkon për jetë e mot”, deklaroi Hoxha, nën thirrjet e pjesëmarrësve “UÇK, UÇK, UÇK”.
Hoxha tha se nga Prishtina po dërgohet mesazhi se Kosova pret drejtësi dhe dinjitet, duke përmendur Hashim Thaçin, Kadri Veselin, Jakup Krasniqin dhe Rexhep Selimin.
“Po e pret që Hashim Thaçi, Kadri Veseli, Jakup Krasniqi e Rexhep Selimi të kthehen në shtëpinë e vet”, tha ajo.
Ndërkaq, Ismail Tasholli tha se marshimi i ditëve të fundit ka treguar, sipas tij, se “Kosova e do UÇK-në”.
Ai tha se, pavarësisht përpjekjeve për ta dëmtuar reputacionin e UÇK-së, ajo është rikthyer, siç u shpreh, “si feniksi”.
“Sa më shumë janë mundu me e ligështu, na u ka rikthy si feniksi. Ma e fuqishme se kurrë, sepse fuqinë ushtari i lirisë e merr prej vendit të tij dhe njerëzve të tij”, u shpreh Tasholli.
Organizatorët kanë deklaruar se presin që më 16 shtator të ketë vendim për ish-krerët e UÇK-së dhe që ata të lirohen e të kthehen në Kosovë.