Analisti politik, Ylli Hoxha, i ftuar në “Debat Plus”, për mesazhin e emisarit të ShBA-së, Gabriel Escobar, ka thënë se me ardhjen e tij kanë ndodhur dy zhvillime, të cilat sipas tij, tregojnë për rëndësinë e vizitës.
“E para është marrëveshja për energjinë mes COST-it dhe Elektroserverit dhe thirrja e kryeministrit Kurti drejt kryetarëve të partive opozitare për një takim”, tha Hoxha.
Ai tha se në mediat e tjera po raportohet se ideja e një marrëveshjeje të shpejtë për çështje javësh, po vjen më shumë në shprehje. Hoxha tha se në këtë aspekt, ka dy probleme. Problem i parë, sipas tij, është se si të bindet Serbia, dhe cilat janë kërkesat për Kosovën në lidhje me marrëveshjen.
“Dhe nëse këto të dyja marrin përgjigje pozitive në Beograd, mendoj që Kosova duhet të jetë e gatshme për t’u përballur me presionin që do të na vijë për marrëveshjen”, shtoi Hoxha.
Ndërkaq, ai theksoi se do të jetë sfidë për ta arritur njohjen. Sipas Hoxhës, është e rëndësishme që në Kosovë të flitet se çka do të zëvendësonte njohjen e Serbisë, dhe sipas tij, përgjigjja do të ishte anëtarësimi në NATO.