Deputetja e Partisë Demokratike të Kosovës, Eliza Hoxha, ka kritikuar Ministrinë e Arsimit për menaxhimin e teksteve shkollore për vitin e ri shkollor.
Ajo ka akuzuar Ministrinë për dështimin në sigurimin e teksteve për nxënësit, duke theksuar se kjo i ka kushtuar shtetit 20 milionë euro, ndërkohë që oferta zyrtare e shtëpive botuese ishte vetëm 5 milionë euro.
“Ministria e Arsimit e ka shkelur ligjin që parasheh ofrimin e teksteve shkollore falas dhe ka bërë që të njëjtat tekste të blihen shumë më shtrenjtë,” deklaroi Hoxha.
Hoxha theksoi se përmes këtij “eksperimenti”, qytetarët paguajnë më shumë për tekstet shkollore, duke cituar se një libër me çmim të deklaruar 7 euro shitet për 12 euro në librari.
“Nëse shumën e shtuar prej 5 eurosh për çdo libër e shumëzoni me numrin e nxënësve, rezulton se për një libër shpenzohen mbi 1 milion euro më shumë,” tha ajo.
Deputetja kërkoi që ky “eksperiment” të hetohet urgjentisht nga prokuroria kompetente për t’i ndalur praktikat e dyshimta dhe për t’i mbrojtur interesat e qytetarëve.