Në konferencën e sotme për media, drejtori i Përgjithshëm i Policisë së Kosovës, Gazmend Hoxha ka njoftuar se Policia e Kosovës është duke zhvilluar hetime intensive për sulmin terrorist që ndodhi të dielën e 24 shtatorit, në fshatin Banjskë të Komunës së Zveçanit.
Hoxha ka thënë se të dhënat e marra nga hetimet tashmë të kryera tregojnë se grupit terrorist i është vënë në dispozicion infrastruktura dhe logjistika e ushtrisë së Serbisë për stërvitje ushtarake para sulmit në Kosovë.
“Këto të dhëna po ashtu tregojnë se grupit terrorist i është vënë në dispozicion infrastruktura dhe logjistika e ushtrisë së Serbisë për stërvitje ushtarake para sulmit në Kosovë. Bazuar në të dhënat e siguruara rezulton se qendra e grupit terrorist ka qenë Kopaniku, përkatësishht hapësira që është pronë e Milan Radoiçiqit”, ka thënë Hoxha
Hoxha ka shtuar se sipas të dhënave të siguruara në këtë fazë të hetimit është vërtetuar ndërlidhja dhe qëndrimi i grupit terrorist në Kopanik, pastaj në Pasuljanske livade (poligoni i ushtrisë serbe) dhe në Banjskë në Kosovë.
Sipas tij, me datën 20 shtator janë bërë përgatitje finale për sulmin që ndodhi katër ditë pas ndaj Policisë së Kosovës.
“Më datën 20.09.2023 në bazë të pamjeve të siguruara shihet se është bërë përgatitje finale për sulmin që ndodhi katër ditë pas ndaj Policisë së Kosovës”, ka shtuar tutje drejtori i Përgjithshëm i Policisë së Kosovës, Gazmend Hoxha.