Organizatorja e marshit “Marshojmë për Drejtësi”, Eliza Hoxha, në marshin e 2 prillit ka thënë se 24 vjet më parë, Prishtina ishte shndërruar në një “qytet fantazmë”.
“Si sot 24 vite më parë, Prishtina ishte shndërruar në një qytet fantazmë. Lumi i njerëzve të dëbuar me forcë nga shtëpitë e tyre nga ushtria dhe paramilitarët serbë, kishte mësyer stacionin e trenit. Ai stacion që ishte i mbyllur për më shumë se dhjetë vite, u hap atë ditë për të na dëbuar jashtë Kosovës në një rrugë pa kthim. Po ne u kthyem, e këto sheshe u mbushën prapë, për të festuar çlirimin dhe pavarësinë”, ka thënë Hoxha.
“Si fotografe e re atëbotë, i mbaj mend shkrepjet e fytyrave me lot gëzimi kur të gjithë bashkë shënuam ato fitore të mëdha. E këto fitore epokale do të ishin të pamundur pa guximin, luftën dhe vetëmohimin e pjesëtarëve të Ushtrisë Çlirimtare të Kosovës. Gjatë këtyre dy javëve, anë e kënd Kosovës, bashkë me Ismajlin e kam rijetuar historinë tonë”, ka thënë tutje Hoxha.
Hoxha ka shtuar se këtë e ka ndjerë në dhimbjen e nënës Ferdonije, në guximin e Shyhretës dhe Vasfijes, në stoicizmin e Fahrije Hotit dhe në qëndresën e bacës Shaban.
“E kam ndjerë në dhimbjen e nënës Ferdonije, në guximin e Shyhretes dhe Vasfijes, në stoicizmin e Fahrije Hotit, në qëndresën e bacës Shaban. E kam parë dhe ndjerë sa e gjallë dhe sa e hapur vazhdon të jetë plaga jonë dhe thirrja për drejtësi”, ka theksuar Eliza Hoxha.
Organizatorja e “Marshojmë për Drejtësi” ka falënderuar qytetarët për pjesëmarrje në këtë marsh, duke shtuar se UÇK na bashkon.
“Të gjithëve. Pa dallim. Thirrja për drejtësi na bashkon. E unë jam e bindur se ky shesh do të buçojë sërish, në ditën e kthimit të luftëtarëve tanë”, ka shtuar ndër të tjerash ajo.