Me 1 nëntor 2025, xhandarmëria serbe dyshohet se ka hyrë brenda territorit të Kosovës në afërsi të Leposaviqit, duke plagosur dhe rrëmbyer një qytetar të Kosovës, Milan Vukashinoviqin (M.V.), i cili është me nacionalitet serb.
Lajmin e bëri të ditur Policia e Kosovës ditën e djeshme.
Sipas Policisë, disa persona të maskuar hynë në territorin kosovar, plagosën dhe rrëmbyen viktimën, të cilën më pas e dërguan në Serbi, në drejtim të qytetit të Nishit, me një autoambulancë.
Policia ka nisur hetimet dhe ka intervistuar dëshmitarë, ndërsa ka bashkëpunuar me KFOR-in për sigurinë në vijën kufitare.
KFOR-i reagoi duke konfirmuar për Dukagjinin se situata përgjatë Vijës Administrative është e qetë dhe se mbetet në kontakt me Policinë e Kosovës për këtë çështje.
Ministri në detyrë i Punëve të Brendshme, Xhelal Sveçla, e konsideroi ngjarjen një shkelje të rëndë të kufirit dhe e drejta e qytetarëve, duke bërë thirrje për reagim ndërkombëtar.
Ai tha se ky është një akt i përsëritur dhe i pandëshkuar, duke përmendur edhe incidente të mëparshme me xhandarmërinë serbe dhe një sulm terrorist në Banjskë.
Ish-zëvendësministri për Komunitete dhe Kthim, Radoica Radomiroviq, pretendon se ka qenë dëshmitar i ngjarjes. Sipas tij, Vukashinoviqi kishte shkuar të blinte mjaltë nga një person i Ushtrisë së Serbisë, Daki Antiq, kur u sulmua nga një grup i armatosur, pjesë e të cilit ishte edhe Milan Radoiçiq.
Radomiroviq i cili për “Betimi për Drejtësi“ thotë se Vukashinoviqi u transportua i plagosur në Spitalin e Prokupljes dhe më pas në Spitalin e Nishit, ku i ishte ndaluar personelit mjekësor të japë informacion për gjendjen e tij shëndetësore.
Ai konfirmon se Vukashinoviqi nuk kishte hyrë kurrë në Serbi që nga viti 2022 dhe ishte i punësuar në pikën kufitare Jarinjë si punonjës sigurimi.
“Milan (Vukashinoviq) nuk i ka lënë institucionet e Kosovës që nga viti 2022 dhe që nga ajo kohë nuk shkon në Serbi. Në vitin 2024, Radoiçiq tentoi ta vriste Milanin duke i vendosur eksploziv nën makinë”, ka shtuar ai.
Vukashinoviq, ka dërguar edhe lokacionin ku pretendon se ndodhi ngjarja dhe thotë se për të gjitha këto ka dhënë deklaratë edhe Policinë e Republikës së Kosovës.
Policia: Xhandarë serbë të maskuar e plagosin dhe e rrëmbejnë një serb në Leposaviq