Ish-ambasadori i Kosovës në Malin e Zi, Ylber Hysa, ka folur rreth zhvillimeve të fundit politike në Mal të Zi, përkatësisht për veprimet e fundit të kryeministrit Dritan Abazoviq rreth marrëveshjes me Kishën Ortodokse Serbe dhe deklarimin për gjenocidin në Srebrenicë.
Abazoviq kishte thënë se “Gjenocidi nuk është kryer ndaj boshnjakëve, por ndaj njerëzve, nuk e kryen ushtritë por politikat djallëzore, politikat e vdekjes, politikat e mashtrimit”, ndërsa gjatë ditës, u kishte kërkuar falje nënave boshnjake për deklarimin e paqartë.
Mirëpo, sipas Hysës, Abazoviq mund të ketë bërë gafë, por mbase edhe mund të mos ketë qenë diçka e tillë.
“Është shumë e vështirë për ta thënë dhe për ta besuar, ta mohosh një krim kaq gjenocidal që ka ndodhur në Srebrenicë. Abazoviq ndoshta ka bërë gafë, ndoshta ka dëshirë të bëjë një politikë të re”, është shprehur Hysa në KlanKosova në edicionin special të mbrëmjes.
Sipas Hysës “Çka do që ka bërë zotëri Abazoviq dhe ka kërkuar falje, tashmë është një gabim i tij i përfshirë, nuk është me rëndësi se çfarë ka menduar ai, por kjo do të mbahet në mend si një njollë dhe lloj vijë e kuqe, që assesi nuk guxon të kalohet, qoftë edhe si gabim retorik”, shtoi ai.
Ai, mes të tjerash, ka thënë se nëse Abazoviq ka tentuar që nga nisja e karrierës së tij të mbajë qëndrime politike qytetare pa nuance etnike, tani me veprimet e fundit ai ka dhënë sinjal se ka devijuar nga ato parime dhe se kjo mbase mund të shihet si një rreshtim në anën serbe, mirëpo një gjë e tillë së shpejti do të konfirmohet.
Ndërsa, Abazoviq ka deklaruar se Marrëveshja Themelore me Kishën Ortodokse Serbe është plotësisht në përputhje me Kushtetutën dhe ligjin.
“Ne kemi pikëpamjet tona politike. Unë pretendoj se kjo nuk ka të bëjë me një kontratë themelore. Koha do të tregojë se cili është qëllimi i vërtetë. Mendoj se problemi është drejtësia dhe se drejtësia është agjenda më e madhe evropiane dhe ofrimi i rezultateve në kapitujt 23 dhe 24”, pohon Abazoviq, ndërsa Hysa ka konsideruar se një gjë e tillë s’ka të bëjë aspak me të drejtën dhe drejtësinë.