28-vjeçari, Uros Vukasinoviq, është i arrestuari nga Policia e Kosovës, i cili dyshohet se javën e kaluar ka ushtruar dhunë ndaj gazetarëve në Leposaviq.
Mediat serbe raportojnë se Vukasinoviq është punonjës i MTS-së, i njohur si Telekomi Mobil i Serbisë që operon në veri.
Sipas policisë, i dyshuari është i komunitetit serb, i identifikuar me iniciale, U.V. “Sot, në orët e hershme të mëngjesit është arrestuar i dyshuari i radhës mashkull serb U.V., me vendbanim në një fshat të komunës së Leposaviqit, i dyshuar për përfshirje në një rast sulm ndaj mediave/gazetarëve”, thuhet në njoftim.
Policia njofton se arrestimi i tij dhe shoqërimi në stacion policor është kryer si rezultat i hetimeve intensive dhe i sigurimit të dëshmive, se i njëjti është përfshirë në sulm ndaj mediave/gazetarëve me datë 16 qershor 2023.
Policia thotë se të gjitha veprimet e mëtejme do të ndërmerren në bashkëpunim dhe në koordinim me organet e drejtësisë.