I mituri që dyshohet se organizoi sulmin në shkollën fillore “Vladislav Ribnikar” në qendër të Beogradit, ku mbetën të vrarë 9 persona, prej tyre 8 fëmijë, tashmë ndodhet në Klinikën për Neurologji dhe Psikiatri për Fëmijë dhe të Rinj.
Këtë e ka bërë të ditur avokatja e familjes, Irina Boroviq, raporton RTS.
Tutje thuhet se Boroviq ka bërë të ditur se i dyshuari është intervistuar nga një këshill mjekësh pas mesnate dhe ekzaminimet e mëtejshme do të vazhdojnë në ditët në vijim.
Boroviq tutje ka thënë se rezultati i gjetjeve toksikologjike të të dyshuarit ka rezultuar negativ.
Ndërkaq, babai i të miturit i cili u ndalua për 48 orë, pritet të dalë nesër në orën 10:00 para Prokurorisë.
Ndryshe, tetë fëmijë dhe një roje u vranë mëngjesin e së mërkurës në një sulm të armatosur nga një nxënës 13 vjeç në shkollën fillore “Vladislav Ribnikar” në qendër të Beogradit.
Gjashtë nxënës dhe një mësuese u plagosën, ndërsa sulmuesi u arrestua.
Motivet e sulmit ende nuk dihen.