Sulmuesi i Dukagjinit, Theophilus Solomon, është arrestuar të dielën nga Policia e Kosovës.

Lajmin për TV Dukagjinin në një përgjigje me shkrim e ka konfirmuar zëdhënësi i Policisë, Daut Hoxha.

Ai ka thënë se futbollisti tashmë është dërguar në mbajtje.

“Mund të ju konfirmoj se një person shtetas i huaj, i kërkuar nga INTERPOL, konkretisht nga Republika e Shqipërisë është arrestuar nga Policia e Kosovës dhe është dërguar në mbajtje për procedura të mëtejme sipas ligjeve në fuqi të Republikës së Kosovës,” tha Hoxha.

Arrestimi i Solomonit dyshohet të ketë ndodhur para fillimit të ndeshjes mes Dukagjinit dhe Dinamos, në stadiumin “18 qershori” në Klinë, sfidë e vlefshme për Kupën e Kosovës.

Ai akuzohet për dhunë fizike ndaj ish të dashurës së tij, gjatë kohës sa ishte në Shqipëri.

Futbollisti nga Nigeria ishte arrestuar edhe kur kishte qenë pjesë e skuadrës së Gjilanit. Teksa, ishte liruar me kusht.

Solomon e kishte për detyrë të lajmërohet në Policinë e Kosovës për çdo tre muaj, por nuk e kishte bërë një gjë të tillë.