Një grua është gjobitur me 300 euro në Prizren pasi i la fëmijët e saj të mbyllur në veturë, në temperatura të larta.
Sipas Policisë, rasti ka ndodhur më 27 qershor 2026, rreth orës 17:50, në parkingun e një qendre tregtare në Prizren, pasi autoritetet morën informacion se disa fëmijë ndodheshin të mbyllur brenda një automjeti.
Policia ka reaguar menjëherë duke dalë në vendin e ngjarjes dhe, me ndihmën e një shufre metalike, ka hapur veturën. Fëmijët janë gjetur të lodhur dhe të dehidratuar si pasojë e temperaturave të larta.
Ndërkohë, në vendngjarje është paraqitur edhe e ëma e tyre. Për shkak të moskujdesit ndaj fëmijëve, policia i ka shqiptuar asaj gjobë prej 300 eurosh për kundërvajtjen “Moskujdes ndaj të miturit”.
Policia e Kosovës ka apeluar te qytetarët që, gjatë ditëve me temperatura të larta, të mos lënë në asnjë rast fëmijë, të moshuar apo persona të sëmurë të mbyllur në automjete, duke theksuar se pasojat mund të jenë fatale.