Policia e Kosovës ka bërë të ditur se një djalë ka goditur me sëpatë babanë e tij në Gjilan të premten.
Sipas raportit 24-orësh të Policisë, viktima ka pësuar lëndime të rënda për çka është duke u trajtuar në Qendrën Klinike Universitare të Kosovës, njofton Dukagjini.
Ndërkaq për djalin e mitur është konstatuar nevoja emergjente për strehim për shkak të gjendjes psikologjike dhe traumës që ka pësuar nga ngjarja.
“Gjilan 20.02.2026 -19:30. Nga Spitali Rajonal është marrë informata se viktima mashkull kosovar, është sjellë me urgjencë për shkak të lëndimeve të pësuara nga goditja me sëpatë, nga i dyshuari mashkull kosovar djali i tij i moshës se mitur. Viktima pas ekzaminimeve mjekësore për shkak të gjendjes së rëndë është transportuar për në QKUK për trajtim të mëtutjeshëm. Në vendin e ngjarjes kanë dalë njësitet policore dhe përfaqësuesi i QPS-së i cili është marrë me personin e mitur. Punëtori social ka realizuar vlerësimin fillestar të fëmijës ku është konstatuar nevoja emergjente për strehimin e fëmijës për shkak të gjendjes së rënduar psikologjike dhe situatës traumatike të shkaktuar nga ngjarja. Rasti duke u hetuar”, thuhet në raportin policor.