Gjuha e përdorur nga zyrtari i Nismës Socialdemokrate, Zafir Berisha, në drejtim të autorit të emisionit “Debat Plus” në RTV Dukagjin, Ermal Panduri, është dënuar nga bordi i Asociacionit të Gazetarëve të Kosovës.
Berisha në profilin e tij në Facebook, ka shkruar se “Ermal Panduri i Dukagjinit vazhdon të mbetet zëri më besnik i politikës së Serbisë, se si i trajton temat që lidhen me luftën dhe me mostrumin politik në Hagë.”
AGK-ja ka theksuar se çdo asocim i gazetarëve dhe mediave me Serbinë është i papranueshëm dhe tejet i rrezikshëm, sidomos për një proces të ndjeshëm siç është ai i Hagës.
“AGK-ja, u bënë thirrje politikanëve që të përmbahen nga gjuha e tillë kundër gazetarëve, sepse si pasojë e saj, gazetarët shpesh bëhen cak i kërcënimeve dhe fyerjeve nga opinioni”, thuhet në reagimin e tyre.
Pas këtij reagimi nga AGK, Berisha ka shkruar sërish, duke sulmuar sërish mediat.
Berisha reagimin e AGK-së e ka cilësuar si shumë qesharakë, sipas tij AGK-ja duke u thirrur në të drejtën e mbrojtës të shprehjes, po i pengon në mendimin e tij.
“AGK-ja paska reagu për mendimin tim të lirë të shprehur para 1 ore në fb tim personal për qasjen se si pandurat i shtjellojnë temat për UÇK-së, shumë shumë qesharake!!!Të thirrur me të drejtë në mbrojtje të shprehjes dhe mendimit të lirë, AGK-s po i pengon mendimi i të tjerëve i lirë për temat që i trajtojnë anëtarët e saj, ama demokraci se jo mahi”, ka shkruar Berisha.
Ai ka ngritur “dilemën e madhe” se cila është e drejta e AGK-së dhe e gazetarëve aspo siç i quan Berisha “panturave” të ia kufizojnë mendimin në tema të caktuara.
“Nëse je gazetar, për mendimin tim, nuk ki të drejtë as pronësi në shprehje të mendimit dhe fjalës e lirë, prandaj reagimi i tyre përveçse është qesharak, është edhe përpjekje primitive mbi pronësinë e asaj se si duhet të shprehen të tjerët. Në fund të fundit, cila është e drejta ligjore e AGK-ja dhe e panturave që me më kufizu në mendimin tim për tema të caktuara? Dhe AGK-ja duhet ta dijë, nëse e ka harruar po ja kujtoj se 90% e aktakuzës që sot u dëgjua në mostrumin politik në Hagë janë “fakte” që janë botuar nëpër paqavura informative që mbrohen dhe përfaqësohen nga AGK-ja, se di pse atëherë kanë heshtë…”, ka shtuar Berisha.