Një i ri nga Kosova ka humbur jetën të dielën në mbrëmje në Suedi, në një rast që autoritetet suedeze po e trajtojnë si pjesë të dhunës mes grupeve kriminale.
Lajmin e kanë konfirmuar familjarët e viktimës, të cilët kanë bërë të ditur se ai është qëlluar aksidentalisht derisa po ecte në një lagje, në momentin kur dyshohet se po zhvillohej një konflikt mes bandave rivale. Sipas tyre, i riu është goditur nga plumba të shkrepur gjatë përplasjes, duke e cilësuar ngjarjen si tragjike dhe të papritur.
Për rastin kanë raportuar edhe mediat suedeze. Sipas “Aftonbladet”, autori i dyshuar ka lëvizur me biçikletë dhe ka shtënë me armë zjarri ndaj viktimës.
Media raporton se pasi i riu ka rënë në tokë, sulmuesi është afruar sërish dhe ka qëlluar edhe një herë nga distancë e afërt, duke e përshkruar ngjarjen si një “ekzekutim të mirëfilltë”.
Autoritetet suedeze kanë arrestuar një të dyshuar për rastin, i cili raportohet të jetë nën moshën 18-vjeçare.
Hetimet për motivet dhe rrethanat e plota të ngjarjes janë duke vazhduar.