Ndërmarrja Hidroekonomike “Ibër Lepenci” ka zhvilluar sot një aksion në zonën e Ujmanit, me qëllim kthimin në pronësi të shtetit të pronave që, sipas autoriteteve, ishin uzurpuar dhe shfrytëzuar për më shumë se dy dekada.
Gjatë aksionit janë rrënuar 11 objekte, të cilat dyshohet se ishin ndërtuar pa leje në pronat e ndërmarrjes.
Këto objekte lidhen me familjarë të zyrtarëve të lartë të Listës Serbe dhe persona të afërt me ta, të cilët kanë pasur edhe funksione në strukturat paralele në veri të Kosovës.
Në mesin e personave me të cilët lidhen objektet e rrënuara janë përmendur Ivan Zaporozhac, nënkryetar i Listës Serbe dhe kryesues i Kuvendit Komunal të Mitrovicës së Veriut, Bozho Bozhoviq, i cili sipas raportimeve është kunat i Zvonko Veselinoviqit, si dhe vëllezërit binjakë Predrag dhe Nenad Radovanoviq, këshilltarë të kryetarit të Komunës së Zveçanit, Dragisha Miloviq.
Aksioni ka nisur në orët e hershme të mëngjesit dhe është konfirmuar edhe nga Policia e Kosovës.
Zëvendësdrejtori i Policisë së Kosovës për rajonin e veriut, Veton Elshani, ka deklaruar për “Veritasinfo” se Policia ka ofruar mbështetje gjatë operacionit, i cili, sipas tij, ka kaluar pa incidente apo pengesa.
Ky nuk është aksioni i parë i këtij lloji. Edhe gjatë muajit qershor, institucionet e Kosovës kishin ndërmarrë veprime për rrënimin e disa objekteve të ndërtuara pa leje në veri të vendit.
Mujka i Ibër Lepencit konfirmon aksionin për rrënimin e 11 shtëpive në Ujman
Autoritetet kanë bërë të ditur se këto veprime janë pjesë e zbatimit të legjislacionit në fuqi për planifikimin hapësinor, ndërtimin dhe përdorimin e objekteve, me qëllim trajtimin e ndërtimeve të realizuara pa lejet përkatëse, pa marrë parasysh pronësinë apo përdoruesit e tyre.