Në një konferencë për media, Instituti i Kosovës për Drejtësi (IKD), ka njoftuar se ka evidentuar regres në efikasitetin e Prokurorisë Speciale të Republikës së Kosovës (PSRK). Sipas IKD-së, kjo ka ndodhur për arsye që PRSK-ja gjatë vitit 2021 ka zgjidhur më pak lëndë sesa në vitin 2020.
Sipas Ramiz Durmishit, hulumtues i IKD-së, gjatë vitit 2021, prokurorët specialë nuk kanë arritur të përmbushin normën orientuese në zgjidhjen e lëndëve, edhe pse numri i prokurorëve ka qenë i njëjtë.
Monitoruesja ligjore e IKD-së, Aurela Mërlaku, është shprehur se IKD-ja ka evidentuar regres edhe në efikasitetin e Departamentit Special të Gjykatës Themelore në Prishtinë gjatë vitit 2021, në krahasim me vitin 2020. Mërlaku ka shtuar se ky regres gjatë vitit 2021 pothuajse ka dyfishuar numrin e lëndëve të pazgjidhura në fund të periudhës raportuese (nga 59 në 101)”.
“Kjo sepse, nëse marrim parasysh aktgjykimet dënuese dhe liruese, del se 80.6% e personave të akuzuar nga PSKR janë shpallur fajtorë nga gjykata. Ndërsa, nga totali i personave të dënuar nga Departamenti Special i Gjykatës Themelore në Prishtinë, 53.52 për qind e tyre janë dënuar me burgim efektiv”.
Sipas saj, këto rezultate nuk reflektohen edhe në rastet e korrupsionit. Mërlaku ka shtuar se si në fund të vitit 2020, ashtu edhe në fund të vitit 2021, i kanë mbetur të pazgjidhura vetëm nga pesë lëndë.
“Kështu, ishte i paarsyeshëm avancimi i tre gjyqtarëve shtesë në këtë Departament. Duke vepruar në këtë mënyrë, KGJK pa nevojë ka rritur numrin e gjyqtarëve në këtë Departament, duke dobësuar kështu departamentet dhe gjykatat prej nga vijnë gjyqtarët e avancuar”, ka shtuar monitoruesja ligjore e IKD-së.