Instituti i Kosovës për Drejtësi (IKD) i ka rekomanduar komunës së Prishtinës që ta anulojë vendimin e 18 gushtit lidhur me mbylljen e qarkullimit të mjeteve motorike në një pjesë të rrugëve “Rexhep Luci” dhe “Qamil Hoxha”, njëherit, edhe rrugët që kalojnë nëpër parkun e Universitetit të Prishtinës dhe të Bibliotekës Kombëtare.
Sipas IKD-së, reforma të kësaj natyre nuk duhen implementuar pa arsyetimin ligjor, si dhe pa koordinimin me ekspert të fushës. Nga e njëjta kanë theksuar se si shkak i shkeljes së disa dipozitave, vendimi konsiderohet i paligjshëm.
“Vendimi i datës 18 Gusht 2023 për mbylljen e qarkullimit të mjeteve motorike në një pjesë të rrugëve “Rexhep Luci” dhe “Qamil Hoxha” si dhe në rrugët e rrugicat të cilat kalojnë nëpër parkun e Universitetit të Prishtinës dhe Bibliotekës Kombëtare është marrë në shkelje të dispozitave lidhur me procedurën administrative dhe dispozitat që rregullojnë formën apo elementet e detyrueshme të aktit administrativ, duke e bërë kështu këtë vendim të paligjshëm, në kuptim të nenit 52 të Ligjit nr.05/L-031 për Procedurën e Përgjithshme Administrative (tutje: LPPA). Ky vendim nuk është hartuar në përputhje me paragrafin 1 të nenit 47 të LPPA, ku shprehimisht thuhet se akti administrativ i shkruar përmban: 1.1. pjesën hyrëse, […], 1.2. pjesën urdhëruese (dispozitivin), […] 1.3. pjesën arsyetuese (arsyetimin), […] 1.4. pjesën përmbyllëse, që tregon kohën e hyrjes në fuqi të aktit, informatat për mjetet juridike, përfshirë organin publik apo gjykatën ku paraqitet mjeti juridik administrativ apo gjyqësor, formën e mjetit, afatin përkatës dhe mënyrën e llogaritjes së tij (këshillën juridike)”, thuhet në reagimin e IKD-së. “Si rrjedhojë është e qartë se vendimi në fjalë është hartuar tërësisht në kundërshtim me LPPA, meqë i njëjti, nuk përmban as arsyetimin dhe as këshillën juridike.”
Vendimi pritet të hyjë në fuqi më 1 Shtator 2023.
Ndërkaq, kryetari Përparim Rama kishte njoftuar më datën 23 gusht mbylljen e këtyre rrugëve, gjersa kishte theksuar se nuk do të lejonte që dhjetëra vetura që parkohen në hapësira të përbashkëta publike të privojnë shfrytëzimin e kësaj hapësire në të mirë të të gjithë qytetarëve.