Në 2019-tën, në dalje të Samadraxhës, Ilir Haxhiaj ka ndalur veturën e tij në anën e djathë të rrugës dhe ka nxjerrë gruan e tij jashtë veturës dhe ka filluar ta grushtojë.
Haxhiaj gruas së tij, Hadije Dinës i kishte kapur kokën dhe disa herë e kishte goditur për asfalti duke i shkaktuar lëndime vdekjeprurëse.
Kështu ka qenë pretendimi i Prokurorisë së Prizrenit që sot u vërtetua me një aktgjykim të Gjykatës.
Për herë të dytë, Haxhiaj u dënua nga Themelorja e Prizrenit me 15 vjet burgim.
Ajsar Skenderi, gjykatëse ka thënë se “Nga të gjithë dëshmitarët e dëgjuar por edhe nga vet deklarata e të akuzuarit është vërtetuar se është një fakt i pakontestueshëm se I akuzuari me të ndjerën kanë pasur marrëdhënie të tronditura martesore, I akuzuari vazhdimisht e ka maltretuar fizikisht dhe psiqikisht tani të ndjerën Hadije Dina me të cilën ka jetuar në bashkësi jashtëmartesore për 23 vite”.
Gjykatësja tregoi gjithashtu se nuk qëndron pretendimi i të akuzuarit dhe mbrojtësit të tij se viktima ishte hedhur vet nga vetura.
Ajsar Skenderi, gjykatëse ka thënë se “Gjykata ia fali besimin ekspertit të komunikacionit dhe gjeti se e ndjera nuk është hedhur vet nga automjeti por të njëjtën e ka nxierr i akuzuari Ilir Haxhiaj duke i shkaktuar lëndime të rënda trupore nga të cilat ajo më vonë ndërron jetë”.
Mbrojtësi i viktimës e kundërshtoi kualifikimin e veprës penale si “Lëndim i rëndë trupor” rrjedhimisht edhe dënimin prej 15 vjetësh.
Zahir Hamza, avokati mbrojtës ka thënë se “në bazë të këtij kualifikimi, denimi maksimal është 15 vite por si përfaqësues i palës gjithmonë kanë kundërshtuar këtë kualifikim pasi që kemi të bëjmë me një vepër penale të vrasjes”.
Vendimin e Gjykatës së Prizrenit në 2021-tës e kishte kthyer në rigjykim Gjykata e Apelit.