Profesori i shkencave politike në Universitetin e Prishtinës, Dorajet Imeri, ka reaguar lidhur me vizitën e Milorad Dodik në Shtëpinë e Bardhë, duke theksuar se ky zhvillim mbart rrezik serioz keqinterpretimi politik, veçanërisht për konsum të brendshëm dhe për destabilizim rajonal.
Sipas Imerit, vizitat në Shtëpinë e Bardhë kanë para së gjithash peshë simbolike, pasi “interpretohen gjerësisht si shenjë legjitimiteti politik dhe si konfirmim i relevancës ndërkombëtare të aktorëve që marrin pjesë në to”.
Ai vëren se pikërisht kjo simbolikë shfrytëzohet shpesh nga aktorë problematikë për forcimin e pozitave të tyre politike.
Më tej profesori Imeri në Facebook ka shkruar se shqetësimi nuk lidhet me politikën amerikane, por me historikun e vetë liderit serb të Bosnjës.
“Ai ka qenë dhe mbetet një aktor që në mënyrë të vazhdueshme ka minuar paqen dhe stabilitetin në Bosnjë-Hercegovinë dhe më gjerë në rajon”, shkruan ai duke rikujtuar edhe deklaratat e Sekretarit amerikan të Shtetit, Marco Rubio, se Dodik po minon institucionet e Bosnjës dhe po kërcënon sigurinë e saj.
Imeri nënvizon se Dodik “nuk është thjesht një figurë kontroverse, por një politikan që sistematikisht ka sfiduar rendin kushtetues të Bosnjë-Hercegovinës”, duke promovuar narrativa separatiste dhe duke relativizuar krimet e luftës, përfshirë gjenocidin në Srebrenicë.
Në fund, ai paralajmëron për pasojat që kjo qasje mund të ketë për Kosovën dhe rajonin, duke theksuar se “problemi kryesor qëndron në faktin se Dodiku e shfrytëzon çdo platformë ndërkombëtare për të ndërtuar imazh legjitimues”.
Sipas tij, fokusi i debatit duhet të mbetet te përgjegjësia politike e Dodikut si faktor destabilizues dhe pengesë për paqen e qëndrueshme dhe bashkëpunimin rajonal.