Autoritetet indiane të dielën e 28 gushtit kanë rrënuar dy ndërtesa të larta, të cilat ishin ndërtuar në mënyrë të paligjshme pranë kryeqytetit Nju Delhi. Këto objekte u bënë strukturat më të larta të rrënuara ndonjëherë në vend në më pak se 10 sekonda.
Gjykata e Lartë, vitin e kaluar, ka urdhëruar prishjen e kullave në zonën e Noidës pasi një betejë e gjatë ligjore ka zbuluar se ato shkelnin rregulloret e shumta të ndërtimit dhe normat e sigurisë nga zjarri.
Për shkatërrimin e këtyre dy ndërtesave janë përdorur mbi 3 mijë e 700 kg eksplozivë. Eksplozivët e vendosur në mënyrë strategjike kishin për qëllim të siguronin dëme minimale në atë zonë, raporton reuters.
Ndërkaq, për këtë veprim të shtetit indian kanë reaguar shumë njerëz, të cilët vendimin për të hedhur në erë kullat e kanë cilësuar si një veprim të rreptë kundër korrupsionit dhe i cili do të shërbejë si shembull dhe paralajmërim për ndërtuesit dhe kompanitë e ndërtimit.
Shpërthimi i së dielës pritej të linte mbi 80 mijë tonë rrënoja, shumica prej të cilave do të përdoren për të mbushur vendin dhe pjesa tjetër do të riciklohet.
Por, nga frika e ndotjes dhe e ndonjë rreziku shëndetësor nga mbeturinat masive, disa familje janë zhvendosur nga ajo zonë të shtunën e 27 gushtit.