Ky lokal gastronomie në qendër të Mitrovicës Veriore është në pronësi të djalit të dyshuarit serb për sulme ndaj Policisë, Milan Radojçiq.
Inspektorati i Komunës, atë por edhe shumë të tjera i ka paralajmëruar se do të rrënohen nëse nuk paguajnë obligimet ligjore të kërkuara nga organet lokale.
Pos këtu, të tilla lokale ka edhe në Lagjen e Boshnjakëve.
Kryesuesi i Kuvendit të Mitrovicës Veriore, Nedzad Ugljanin tha se ky aksion nuk ka të bëjë me pronar të lokaleve specifike.
“Ne sipas rregullores edhe vendimeve që i kemi pru si kuvend komunal për lirimin e hapësirave publike, ata po ndërmarrin masa konkrete në terren. Jo vetëm ku po përmendët një lokal në pronësi të një Petroviqi a Radojqic ne nuk e dimë por është puna e inspektoratit me dal në terren jo vetëm aty por edhe në lagjen e boshnjakëve edhe nëpër vende tjera të qytetit,” ka thënë Nedzad Ugljanin, Kryesues i Kuvendit Komunal në Mitrovicën Veriore.
Në mënyrë që mos të ndërhyjë Inspektorati, gastronomët duhet t’i paguajnë komunës një shumë të caktuar taksa, që Ugljanin tregon se po kundërshtohet.
“Atyre po i duket shuma e madhe, sipas rregullores që është shuma 4 euro për një metër katëror edhe sene të tjera që janë përmendur në kuadër të bisedimeve,” shtoi Ugljanin.
Pronarët e lokaleve që tarracat i kanë të ndërtuara pa leje, u është dhënë 10 ditë afat që të bëjnë pagesën e kërkuar.
Inspektoratit komunal po i asiston edhe Policia e Kosovës në terren.