Instituti Hidrometeorologjik i Kosovës ka paralajmëruar për vërshime, duke u bazuar në situatën e përgjithshme meteorologjike në vend.
IHMK njofton se në rajon situata meteorologjike nuk është stabile, e cila është duke u përcjellë edhe me reshje shiu.
“Këto reshje kanë ndikuar edhe në tejngopjen e tokave, sidomos nëpër viset e ulëta dhe përgjatë rrjedhave lumore. Situatë e tillë me reshje, parashikohet të mbajë edhe gjatë ditëve në vijim, ku duke filluar nga nesër dt: 12/06/2023, pritet që të ketë reshje në intervale të ndryshme, duke përfshirë pjesën më të madhe të vendit, ndërsa në disa zona ato do të jenë më intensive, të cilat mund të krijojnë vërshime të shpejta, të karakterit lokal, sidomos në lumenjtë me karakter të rrëkeve, të cilat zbresin prej viseve malore, ku si pasojë do të ketë tejkalim të kapaciteteve transportuese të tyre dhe mundësi të paraqitjes së vështirësive në sistemet e kanalizimeve, shembje të dheut, probleme në komunikacion, bujqësi etj”, thuhet në njoftimin e Insitutit Meterologjik të Kosovës.
Në këtë njoftim thuhet se nga këto prognoza me mundësi vërshime në interval afatshkurtër nga shiu, parashihet që të kenë ndikim në këto zona:
– Pjesa veriore: Pellgu i Ibrit (Sistemet lumore të: Ibrit, Sitnicës Llapit, Drenica etj.) ku probabiliteti për të tejkaluar një prag të periudhës së kthimit të përmbytjeve 20-vjeçare: është 20 %, ndërsa 5-vjeçare: 24 %.
– Ndërsa pjesa Perëndimore, jugore dhe lindore (Pellgu i Drinit të Bardhë, Lepencit dhe Moravës së Binçës), parashikohet një probabiliteti për të tejkaluar një prag të periudhës së kthimit të përmbytjeve 5-vjeçare, gjegjësisht sasi më e vogël e reshjeve.