Instituti për Studime të Luftës Hibride “Octopus” dhe Instituti Shqiptar për Studime Ndërkombëtare (AIIS) kanë nënshkruar të enjten në Tiranë një Memorandum Bashkëpunimi për hulumtime dhe aktivitete të përbashkëta në fushat e gjeopolitikës dhe sigurisë.

Drejtori i “Octopus”, Arben Fetoshi, tha se marrëveshja synon forcimin e bashkëpunimit në projekte kërkimore dhe aktivitete me interes të përbashkët, veçanërisht në fushën e sigurisë.

Sipas Fetoshit, bashkëpunimi do të fokusohet në dezinformimin gjeopolitik, operacionet e ndikimit dhe narrativat strategjike, duke synuar zhvillimin e një platforme për dialog rajonal dhe rritjen e qëndrueshmërisë ndaj kërcënimeve hibride.

Ai ka falënderuar Prof. Dr. Arian Starovën dhe Prof. Dr. Albert Rakipin për mbështetjen, pritjen dhe bisedën përmbajtësore mbi, siç ka thënë, sfidat gjithnjë më komplekse të sigurisë, derisa është shprehur i sigurt se bashkëpunimi me drejtoreshën e AIIS-it, Alba Çela, do të ndërtojë kornizën e përgjigjeve efektive ndaj sfidave të demokracisë dhe përcaktimit euro-atlantik.