Inspektorati Policor i Kosovës, të hënën e 2 janarit, ka rekomanduar suspendimin e një zyrtari policor, i cili është i angazhuar me detyrë në Prizren.
Në një përgjigje për Portalin Dukagjini, zëdhënësi i IPK-së, Arbër Beka, ka thënë se zyrtari policor dyshohet për veprën penale “Kanosje”.
“Duke ju referuar kërkesës suaj, Inspektorati Policor i Kosovës ju konfirmon se ka rekomanduar suspendimin e një zyrtari policor i angazhuar me detyrë në Prizren. Rekomandimi për suspendim është bërë dje, pasi i njëjti është i dyshuar për veprën penale të kanosjes”, ka bërë të ditur Beka.
Krahas kësaj, Beka ka thënë se veprimet e tjera do të ndërmerren në përputhje me autorizimet ligjore të IPK-së dhe njëherit, koordinimin me Prokurorinë kompetente.