Ministri i Jashtëm i Iranit, Abbas Araghchi, ka deklaruar se vendi i tij është i hapur për bisedime me shtetet që kërkojnë kalim të sigurt të anijeve përmes Ngushticës së Hormuzit.
Në një intervistë për CBS News, Araghchi tha se disa vende i janë drejtuar Iranit për të diskutuar sigurinë e lundrimit në këtë rrugë detare, ku sulmet iraniane ndaj anijeve kanë bërë që trafiku të ndalet pothuajse plotësisht.
Ai nuk përmendi emrat e shteteve që kanë kërkuar bisedime.
Araghchi shtoi gjithashtu se objektet bërthamore të Iranit janë aktualisht “nën rrënoja” dhe se për momentin nuk ka as program e as plan për t’i rikuperuar ato, raporton BBC.
Sipas tij, gjatë negociatave të mëparshme me Shtetet e Bashkuara të Amerikës për marrëveshjen bërthamore, Irani kishte ofruar të ulte përqindjen e uraniumit të pasuruar.
“Kjo ishte një lëshim i madh,” tha ai, duke shtuar se konflikti aktual e ka ndryshuar situatën dhe se tani “asgjë nuk është në tryezë, gjithçka varet nga e ardhmja”.
Për dekada, SHBA-ja dhe Izraeli e kanë akuzuar Iranin se po përpiqet të zhvillojë fshehurazi armë bërthamore.
Irani i ka mohuar vazhdimisht këto akuza, duke thënë se programi i tij bërthamor ka vetëm qëllime paqësore, megjithëse vendi është i vetmi shtet pa armë bërthamore që ka pasuruar uranium në nivele afër gradës së armëve.