Komanda e përbashkët ushtarake e Iranit ka bërë të ditur se Ngushtica e Hormuzit është mbyllur sërish për qarkullimin detar, duke akuzuar Shtetet e Bashkuara dhe Izraelin për shkelje të marrëveshjes së armëpushimit të arritur së fundmi.
Sipas deklaratës së transmetuar nga televizioni shtetëror iranian, vendimi për mbylljen e kësaj rruge strategjike ndërkombëtare është marrë pas asaj që Teherani e cilëson si “shkelje të qartë të besimit dhe angazhimeve” të përcaktuara në memorandumin e mirëkuptimit që synonte t’i jepte fund përshkallëzimit të konfliktit me Iranin.
Autoritetet iraniane theksojnë se pika e parë e memorandumit parashihte “ndërprerjen e menjëhershme dhe të përhershme të operacioneve ushtarake në të gjitha frontet, përfshirë Libanin”. Megjithatë, Irani pretendon se vazhdimi i operacioneve izraelite në jug të Libanit përbën shkelje të drejtpërdrejtë të kësaj marrëveshjeje.
Ndërkohë, Izraeli ka deklaruar se do të vazhdojë operacionet kundër grupit Hezbollah në Libanin jugor, pavarësisht armëpushimit të shpallur më herët.
Në deklaratën e saj, komanda ushtarake iraniane paralajmëroi gjithashtu se, në rast se veprimet që i konsideron agresive vazhdojnë, janë parashikuar masa të tjera pasuese.
Ngushtica e Hormuzit, një nga korridoret më të rëndësishme për transportin global të naftës dhe gazit, kishte rifilluar funksionimin normal pasi marrëveshja e përkohshme SHBA-Iran ishte nënshkruar në fillim të javës.