Irani ka shprehur gatishmëri për të ndihmuar anijet japoneze që të kalojnë në mënyrë të sigurt përmes Ngushticës së Hormuzit. Këtë e ka deklaruar ministri i Jashtëm iranian, Abbas Araghchi, në një intervistë për agjencinë japoneze Kyodo News.

Japonia mbështetet në masë të madhe te importet e naftës nga Lindja e Mesme, ku pjesa më e madhe e kësaj sasie transportohet pikërisht përmes kësaj ngushtice, një nga rrugët më strategjike për furnizimin global me energji.

Në praktikë, Irani ka vendosur kufizime në këtë rrugë detare si reagim ndaj sulmeve nga Izraeli dhe Shtetet e Bashkuara, duke detyruar vendet që varen nga kjo korridor të kërkojnë alternativa dhe të përdorin rezervat strategjike.

“Ne nuk e kemi mbyllur ngushticën. Ajo mbetet e hapur”, ka theksuar Araghchi gjatë intervistës, duke shtuar se kufizimet vlejnë për vendet që ndërmarrin veprime kundër Iranit, ndërsa për të tjerat ofrohet bashkëpunim dhe asistencë.

Ai nënvizoi se Irani është i gatshëm të garantojë kalim të sigurt për anijet japoneze.

Ndërkohë, Japonia — një nga ekonomitë më të mëdha në botë dhe ndër importuesit kryesorë të naftës — siguron rreth 95% të nevojave të saj energjetike nga Lindja e Mesme, ku rreth 70% e kësaj sasie kalon përmes Ngushticës së Hormuzit.

Autoritetet në Tokio kanë bërë të ditur se kanë filluar përdorimin e rezervave strategjike të naftës, të cilat mbulojnë rreth 254 ditë konsum të brendshëm.

Më 11 mars, vendet anëtare të Agjencisë Ndërkombëtare të Energjisë ranë dakord të përdorin rezervat e tyre për të zbutur rritjen e çmimeve të shkaktuara nga tensionet në Lindjen e Mesme, në atë që konsiderohet si një nga ndërhyrjet më të mëdha të këtij lloji.