Një komandant ushtarak iranian ka paralajmëruar fqinjët jugorë të vendit se nëse territori ose objektet e tyre përdoren nga armiqtë për të sulmuar Iranin, “ata duhet t’i thonë lamtumirë prodhimit të naftës në rajonin e Lindjes së Mesme”, sipas mediave shtetërore.
“Ky paralajmërim vjen pasi disa vende të Gjirit Persik kishin lejuar më parë që territori i tyre të përdorej nga armiqtë e Iranit,” raportoi agjencia e lidhur me shtetin Fars News, duke cituar komandantin e Forcës Ajrore-Hapësinore të Korpusit të Gardës Revolucionare Islamike (IRGC), shkruan CNN, transmeton Dukagjini.
“Tani, nëse kjo vazhdon, burimi i tyre jetik ekonomik do të jetë në rrezik serioz,” tha ai, pa specifikuar se cilat vende po përmendeshin.
Komandanti gjithashtu njoftoi se “lista e objektivave” e Iranit ishte zgjeruar përtej instalimeve ushtarake dhe tani përfshin fusha të mëdha nafte dhe rafineri në të gjithë Lindjen e Mesme, duke përmendur vende specifike në Emiratet e Bashkuara Arabe, Arabinë Saudite, Kuvajt, Katar dhe Bahrein, sipas Fars News.
Shumë nga këto vende të Gjirit janë aleate të Shteteve të Bashkuara, disa prej të cilave strehojnë baza ushtarake amerikane.