Thomas Theiner, një ish-anëtar i ushtrisë italiane, “ekspert për çështje të Luftës së Ftohtë” dhe strategjisë së mbrojtjes së Aleancës, ka thënë se presidenti i Serbisë, Aleksandër Vuçiq, ka marrë një mesazh të qartë nga NATO.
Ky mesazh, sipas Theiner, është përcjellë përmes një oficeri të Shtabit të Përgjithshëm të dielën në mbrëmje.
“Mendoj se oficerët e Shtabit të Përgjithshëm të Serbisë mbrëmë i kanë shpjeguar presidentit Vuçiq se nëse ai guxon të sulmojë Kosovën, aeroplanët luftarakë të NATO-s do të reagojnë brenda pak orësh…”, ka shkruar Theiner në Twitter.
Sipas tij, brenda 48 orëve, në aeroportin e Prishtinës do të transportohej Brigada e 173-të Ajrore e Ushtrisë Amerikane, ndërsa në Aeroportin e Gjakovës, Brigada e Parashutave e Ushtrisë Italiane “Folgore”.
Theiner ka theksuar më tej në Twitter se një ditë më vonë do të aktivizohej Brigada e Mekanizuar e Ushtrisë Italiane “Pinerolo”, e vendosur në Bari dhe rrethinat e saj, dhe do të dërgohej nga Divizioni i III Detar i Marinës Italiane me anijet e saj amfibe nga Brindizi në Durrës brenda dy ditësh.
Theiner ka thënë se NATO ka 23 vjet që po trajnohet për ta mbrojtur Kosovën.
“Nëse serbët ndonjëherë shkojnë dhe sulmojnë, forcat e Aleancës ‘do t’i tejkalojnë’ ata në ajër për disa orë, dhe në tokë për disa ditë”.