Organizata e Veteranëve të Luftës së Ushtrisë Çlirimtare të Kosovës (OVL UÇK) ka njoftuar se ka pranuar një telefonatë nga Haga, nga bashkëluftëtarët që po mbahen atje, të cilët kanë kërkuar që përmes OVL UÇK-së t’i përcillen ngushëllimet familjes Mustafa për humbjen e familjarit të tyre.
Në emër të Hashim Thaçi, Kadri Veseli, Rexhep Selimi, Jakup Krasniqi, Salih Mustafa, Pjetër Shala, Fadil Fazliu dhe Bashkim Smakaj, si dhe në emër të Organizatës së Veteranëve të Luftës së UÇK-së, janë shprehur ngushëllimet më të sinqerta për familjen Mustafa.
“Jemi pranë jush me respekt, solidaritet dhe përulje në këto çaste të rënda”, thuhet në mesazhin e përcjellë nga OVL UÇK, duke nënvizuar se kujtimi për bacën Jahja do të jetojë përherë ndër bashkëluftëtarë dhe në kujtesën kolektive.
OVL UÇK thekson se, pavarësisht rrethanave, lidhja dhe solidariteti me familjet e bashkëluftëtarëve dhe me qytetarët mbeten të palëkundura.