Ish-presidenti Shqipërisë, Alfred Moisiu, në konferencën e liderëve të Ballkanit Perëndimor me temë “Ballkani Perëndimor dhe integrimi në BE – sfidat dhe perspektiva”, ka kritikuar qasjen e Serbisë karshi Kosovës dhe ka kërkuar që Ballkani Perëndimor të bëhet më i sigurtë.
Moisiu është shprehur i shqetësuar nga sulmet e fundit që ndodhën në Banjskë të Zveçanit. Sipas tij, në atë sulm duket qartë se është përfshirë Serbia.
Moisiu ka thënë se duhet të vazhdohen përpjekjet që palët të ulen në bisedime, por ndaj Serbisë duhet kërkohet më shumë.
“Dihet që në fillim duhet të bëjmë Ballkanin Perëndimor më të sigurtë dhe pastaj të flasim për integrim. Pasi gjithë jemi të shqetësuar për pasigurinë e krijuar në vazhdimësi. Këto situata të cilat mund të mendohet se mund të shkohet me zgjidhje të gjata, duhet marrë më seriozisht si nga ne, ashtu edhe nga ata që mbajnë përgjegjësinë për ruajtjen e paqes në Evropë….Më 24 shtator në Banjskë, jo vetme plasi por ndodhën disa gjëra të pakuptueshme, Beogradi jo vetëm që nuk u dënua, por u shpall një dite zie për ata që u vranë…Pra, duket qartë se këtu është përfshirë kokë e këmbë edhe shteti serb“, ka thënë ish-presidenti shqiptar, Alfred Moisiu. /KP
Kujtojmë që të dielën e 24 shtatorit, në fshatin Banjskë të komunës së Zveçanit, Policia e Kosovës u sulmua nga një grup terrorist serb, i cili udhëhiqej nga Millan Radojçiq.
Nga ky sulm mbeti i vrarë rreshteri policor, Afrim Bunjaku, nga Samadrexha e Vushtrrisë, i cili tashmë është shpallur hero. Ndërsa, i plagosur ka mbetur zyrtari policor Alban Rashiti dhe disa të tjerë të lënduar.
Ndërkaq, nga aksioni i Policisë së Kosovës mbetën të vrarë tre pjesëtarë të grupit terrorist serb.