Një ish-zyrtar i Gjendjes Civile në Ferizaj është arrestuar nga Policia e Kosovës më 23.04.2024. Ai dyshohet për keqpërdorim të pozitës apo autoritetit zyrtar. Sipas njoftimit të Policisë, i dyshuari tani mban pozitë tjetër.
“Si rrjedhojë e këtyre veprimeve të njëjtit i ishte mundësuar që të pajiset me letërnjoftim të Republikës së Kosovës dhe pastaj edhe me patentë shofer”- ka njoftuar Policia.
Ai dyshohet se derisa ishte zyrtar i Gjendjes Civile deri në vitin 2019, ka regjistruar një shtetas të huaj (turk) në sistemin elektronik të gjendjes civile në komunën e Ferizajt, pa plotësuar kriteret e fitimit të shtetësisë.
“Me datë 23.04.2024, është siguruar prezenca e të dyshuarit të lartcekur për intervistë në prezencë të avokatit mbrojtës, ku pas intervistës me aktvendim të prokurorit, i njëjti është ndaluar për 48 orë. Ndërsa personi i dyshuar mashkull turk që dyshohet se ka konsumuar veprën penale “Legalizimi i përmbajtjes së rreme” tani është i ekstraduar në Turqi”- thuhet në njoftim.