Shanghai i ka vendosur 26 milionë banorët e tij nën izolim, në vendosjen më të madhe të kufizimeve kundër Covid-19 në mbarë Kinën, raporton “The Guardian“.
Deri këtë javë, qyteti me më së shumti banorë në Kinë, miratoi një qasje të bllokimit me faza. Fillimisht, ana lindore e lumit Huangpu hyri në bllokim midis 28 marsit dhe 1 prillit, më pas ana perëndimore ndoqi shembullin për katër ditë të tjera.
Të hënën, shifra e rasteve të reja ka tejkaluar mbi 10 mijë raste duke konfirmuar dështimin e kësaj qasjeje. Qeveria e Shangait ka konfirmuar mbi 73 mijë raste pozitive që nga marsi.
Një shifër e tillë është e vogël në krahasim me Shtetet e Bashkuara të Amerikës, por, mbetet nga më të mëdhatë qëkur Covid-19 u raportua për herë të parë më 2019.
Së paku, 38 mijë persona, pjesë të personelit mjekësor janë vendosur në Shangai duke konfirmuar se ky është operacioni më i madh që nga bllokimi i Wuhan-it në fillim të 2020.
Të martën, 30 spitale kryesore në të gjithë qytetin kanë pezulluar funksionimin e tyre, sipas faqes së internetit të komisionit shëndetësor komunal të Shangait.
Megjithatë, qytetarët ishin ankuar për mungesën e organizimit dhe përgatitjes së qeverisë. Disa banorë raportuan vështirësi në porositjen e ushqimit dhe ujit me anë të internetit, ndërsa të tjerë kishin deklaruar se nuk ishin në gjendje të aksesonin burimet thelbësore mjekësore kur atyre u duheshin.