Derisa te Izraeli presioni është i madh, atmosfera në kampin e Kosovës duket dukshëm më e qetë para ndeshjes që zhvillohet të enjten, nga ora 20:45, në Debrecen të Hungarisë.
Mediumi izraelit “One” i ka kushtuar vëmendje atmosferës te Kosova, duke shkruar se lojtarët “Dardanë” e kanë shfrytëzuar kohën e lirë për të shëtitur në qytetin hungarez, për të pirë kafe dhe për të shijuar motin me diell.
Sipas mediumit izraelit, futbollistët e Kosovës janë parë të relaksuar në prag të përballjes.
“Në fotografitë e bëra mes stërvitjeve, lojtarët e Kosovës duken të relaksuar dhe të lirë, pa shumë shenja të presionit në prag të ndeshjes. Kjo sjellje mund të interpretohet si ndjenjë e besimit në anën e Kosovës karshi Izraelit dhe, po ashtu, si shenjë se nuk janë shumë të entuziazmuar për kundërshtarin që i pret”, ka shkruar ndër të tjera mediumi izraelit.
Situata është më ndryshe në kampin e Izraelit, ku priten ndryshime të shumta pas humbjeve në dy ndeshjet e fundit. Mbetet të shihet nëse qetësia dhe atmosfera pozitive te Kosova do të reflektohen edhe në fushë në përballjen e së enjtes.