Kryetari i Sindikatës së Bashkuar të Arsimit, Shkencës dhe Kulturës (SBAShK) në Kosovë, Rrahman Jasharaj, ka deklaruar se nuk do të përfundojë greva deri në plotësimin e kërkesave e tyre nga Qeveria e Kosovës.
Ai ka thënë se greva nuk do të përfundojë tinëz, do të përfundojë zyrtarisht ashtu siç është shpallur para mediave, dhe se çdo informatë që del se ka përfunduar greva do të jetë e pavërtetë.
“Greva do të mbyllet, kur qeveria del para mediave dhe tregon se cilat kërkesa do të plotësohen, atëherë ne do t’i thirrim mediat e nderuara dhe do të deklarojmë se greva ka përfunduar”, ka deklaruar Jasharaj, gjatë vizitës në shkollën “28 Nëntori”.
Po ashtu, Jasharaj ka thënë se grevat do të përfundojnë një ditë, por dikush do të turpërohet, dhe sipas tij, ai që do të turpërohet më së shumti është ministri i Financave, Punës dhe Transfereve, Hekuran Murati dhe ministrja e Arsimit, Shkencës dhe Teknologjisë së Kosovës, Arbërie Nagavci.
“Do të turpërohen të dy, pas unë ministres Nagavci i jam lutur, sepse duhet të ishte zëri ynë, të flasë në qeveri për arsimtarët, për kërkesat tona që edhe nëse thonë jo, ta heqë barrën nga vetja, por jo me deklarata se ne kërkuam vetëm 100 euro”, ka thënë Jasharaj
Ndërsa, ai ka thënë se pagat mundet me i ndalë por, sipas tij, SBAShK-u nuk do të ndalet.
“Pagat, mundet me mëndu se na i ndalë, por, ka gjyqe dhe ne nuk do të pushojmë”, ka shtuar ai.
Gjithashtu, Jasharaj ka treguar se SBASHK-u se ka dorëzuar kallëzim penal në Prokurorinë Themelore në Prishtinë për ministrin Murati, pas vendimit për ndalimin e pagave për punëtorët që janë në grevë.
Më 1 shtator, greva në institucionet arsimore po mbahet në pothuajse të gjitha shkollat e vendit, pavarësisht thirrjeve të Qeverisë ndaj mësimdhënësve për të mos respektuar vendimin e SBASHK-ut.