Pavarësisht obligimeve me punë, dëgjuesit besnikë arritën që këtë javë të jenë prezent për t’u bërë pjesë e emisonit. Si çdo ditë tjetër, dëgjuesit në studio patën mundësinë që të presin telefonata dhe të kuptojnë vendet me radar.
Fatosi dhe Valoni, dy mysafirë shumë të lidhur me radion, patën mundësinë që për pjesën e dytë të emisionit “Radar” të zgjedhin rubrikën e tyre të preferuar për ta zhvilluar në emision. Pas pak minutash pauzë, të tre “bashkëmoderatorët” e përkohshëm, u rikthyen në studio me një pyetje “Sa vite keni pa takuar familjarët e juaj që jetojnë në mërgim?”.
Në vrullin e telefonatave dhe nën udhëheqjen e rubrikës nga dëgjuesit në studio, i pari që u lajmërua ishte Agimi nga Prishtina, që tregoi për kushëririn e tij që jeton në Suedi të cilin nuk e ka takuar nga viti ’92 dhe janë njoftuar përmes Facebook pas sa vitesh. Ndërsa dëgjuesja e dytë Gresa, tregoi për nënën e saj që nuk e ka parë që 7 vjet. Gresa ishte fituese e një tikete për aeroplan për kurdo që ajo është gati për të vizituar nënën e saj jashtë Kosovës.
Kurse dëgjuesi Arbeni ka treguar se nuk e ka vizituar Kosovën nga viti ’94, për shkak të problemeve familjare, ndarjes së prindërve kur ai ka qenë në moshën 1 vjecare. Jetesa me gënjeshtrën se babi i tij kishte qenë “vëllai i tij” për shumë vite, moskomunikimi me babain e tij për 20 vjet etj, kanë bërë që ai të mos e vizitojë Kosovën që nga ajo kohë. Arbenit i është dhënë dhe një tiketë nga “Air Tiketa” falas, për të vizituar Kosovën.
Ndër të tjera, dëgjuesit kanë theksuar shpresën e tyre për liberalizimin e vizave, që të kenë mundësi të takojnë familjarët e tyre sa më shpejt.
Për fund, Fatosi ka ndarë me dëgjuesit ndjesitë që përjetoi përgjatë emisionit. Ai pranoi se është shumë më i lehtë bashkëbisedimi përmes telefonit. Gjithashtu, edhe Valoni ka shprehur mirënjohjen e tij për emisionin Radar dhe Edita Dolin dhe ndihmesën që i kanë dhënë shumë njerëzve në nevojë së bashku me ndihmën e ushtarëve të Radarit.
Kjo javë në emisionin Radar i është kushtuar të gjithë dëgjusve që kanë shprehur dëshirën për të qenë në studio pas sa vitesh lidhjeje të afërt me Radio Dukagjinin.