Instituti Hidrometeorologjik i Kosovës, parashikon që java e parë e stinës së vjeshtës do të ketë kushte të ndryshueshme meteorologjike.
Ditën e hënë të 26 shtatorit parashikohet të mbajë mot me vranësira të dendura, të cilat gjatë ditës do të sjellin reshje shiu të intensitetit mesatar.
Edhe ditën e martë të 27 shtatorit parashihet të mbajë mot i ngjashëm, ku pos reshjeve, parashihen edhe pak rreze dielli dhe mundësi për shkarkime rrufesh.
E mërkura e 28 shtatorit do të ketë vranësira më të theksuara dhe më pak reshje, të cilat nuk do të përfshijnë gjithë territorin.
Ndërsa të enjten e 29 shtatorit dhe të premten e 30 shtatorit moti do të jetë më stabil dhe me rritje të lehta të temperaturave në të dy vlerat ekstreme.
Temperaturat minimale do të sillen prej 5 deri në 9 gradë Celsius, ndërsa maksimalet e ditës parashihen të lëvizin ndërmjet 16 dhe 22 gradë Celsius.
Era do të fryejë deri në mesatare nga drejtimi i perëndimit dhe veriperëndimit.
