Instituti Hidrometeorologjik i Kosovës ka njoftuar se java e ardhshme do të karakterizohet me mot të ndryshueshëm, ku do të alternohen periudhat me diell me vranësira dhe reshje lokale shiu të shoqëruara me shkarkime rrufesh.
Sipas parashikimit të IHMK-së, temperaturat do të mbeten relativisht të larta në fillim të javës. Vlerat minimale do të lëvizin nga 8 deri në 18 gradë Celsius, ndërsa maksimalet nga 19 deri në 33 gradë Celsius.
E hëna do të nisë me mot kryesisht me diell, por gjatë pasdites pritet shtim i vranësirave. Në disa zona mund të ketë reshje lokale shiu dhe bubullima. Temperaturat do të arrijnë deri në 33 gradë Celsius.
E marta sjell mundësi për reshje lokale shiu, të shoqëruara me shkarkime rrufesh, kryesisht gjatë pasdites dhe mbrëmjes. Temperaturat maksimale pritet të jenë deri në 32 gradë Celsius.
E mërkura pritet të jetë dita më e paqëndrueshme e javës, me më shumë vranësira dhe reshje në pjesë të mëdha të vendit. Në disa zona reshjet mund të jenë më të dendura dhe të shoqërohen me stuhi lokale. Temperaturat do të pësojnë rënie, me maksimalet nga 23 deri në 26 gradë Celsius.
Nga e enjtja moti pritet të përmirësohet gradualisht, me më shumë intervale me diell dhe pa reshje të konsiderueshme, ndërsa e premtja do të jetë pjesërisht e vranët, me mundësi për reshje lokale gjatë pasdites.
IHMK ka bërë thirrje për kujdes gjatë ditëve të para të javës, veçanërisht për personat me sëmundje kronike kardiovaskulare dhe respiratore, për shkak të temperaturave të larta dhe lagështisë së shtuar të ajrit.
Po ashtu, gjatë zhvillimit të stuhive lokale mund të ketë erëra të përkohshme më të fuqishme, ndaj rekomandohet kujdes për qytetarët dhe fermerët gjatë aktiviteteve në ambiente të hapura.