Deputeti i vetëm shqiptar në Parlamentin e Serbisë, Shaip Kamberi, ka dorëzuar në Kuvendin e Serbisë propozimin për përdorimin e lirë të flamurit shqiptar.
“Në procedurë parlamentare sot dorëzova propozimin për ndryshimin e Ligjit për mbrojtjen e të drejtave dhe lirive të pakicave”, ka shkruar Kamberi.
Kamberi ka treguar se me propozimin e ri ka kërkuar ndryshimin e plotë të nenit 14, eliminimin e pengesave për përdorimin e simboleve, me propozimin që simbolet e pakicave të përdoren lirshëm dhe zyrtarisht gjatë tërë vitit në institucionet e vetadministrimit lokal dhe organet shtetërore në të gjitha komumat në të cilat gjuha e pakicave është gjuhë zyrtare.
“Në rastet e komunave ku pakicat përbëjnë më pak se 5% të strukturës etnike, me këtë propozim kërkohet lejimi i përdorimit të flamurit në festat kombëtare të pakicave nacionale”, ka shtuar Kamberi.
Tutje deputeti i vetëm shqiptar në Parlamentin e Serbisë ka theksuar se ky propozim është përkrahur dhe nga kolegët deputet, Enis Imamovic dhe Selma Kucevic nga SDA e Sanxhakut dhe nga deputeti i pavarur, Aleksandar Olenik.