Faqja e Facebook ka pësuar një ndërprerje të funksionimit, ndërsa raportime nga vende të ndryshme tregojnë se serverët e kompanisë Meta po përballen me probleme në shkallë globale.
Defekti ka shkaktuar ndërprerje në Facebook Messenger, si edhe në aplikacionin dhe faqen kryesore të Facebook. Ndërkohë, shërbime të tjera të Meta-s, si Instagram dhe ËhatsApp, kanë vijuar të funksionojnë në pjesën më të madhe të rasteve, megjithëse janë raportuar probleme sporadike edhe në disa produkte të lidhura me Instagramin.
Shumë përdorues janë nxjerrë automatikisht nga llogaritë e tyre dhe nuk kanë mundur të identifikohen sërish. Në ekran është shfaqur një mesazh gabimi që njofton se “ndodhi një gabim i papritur”.
Edhe faqja zyrtare e Facebook ka shfaqur mesazhe të ngjashme. Vizitorët janë njoftuar se “diçka shkoi keq”, ndërsa kompania ka bërë të ditur se ekipet teknike po punojnë për zgjidhjen e problemit dhe rikthimin e shërbimit sa më shpejt të jetë e mundur.
Deri më tani, Meta nuk ka dhënë detaje mbi shkakun e ndërprerjes, ndërsa përdoruesit në mbarë botën vijojnë të raportojnë vështirësi në aksesimin e platformës, raportohet në mediat e huaja.