Policia e Kosovës ka realizuar një operacion të suksesshëm gjatë të cilit është arrestuar një person i kërkuar me urdhër arrest ndërkombëtar nga Gjermania, i dyshuar për përfshirje në trafikim të narkotikëve.
Sipas njoftimit të Policisë, operacioni është zhvilluar nga Ekipi për Gjurmimin e Personave me fletarrest vendor dhe ndërkombëtar. I dyshuari është identifikuar dhe ndaluar në përputhje me procedurat ligjore në fuqi.
Gjatë kontrollit dhe legjitimimit, ai ka paraqitur dokumente identifikimi të huaja me të dhëna që dyshohet se i përkasin një personi tjetër.
Për rastin është njoftuar Prokurori kompetent nga Departamenti për Krime të Rënda, i cili ka marrë vendim për shqiptimin e masës së ndalimit ndaj të dyshuarit.
Personi i arrestuar është dërguar në Qendrën e Ndalimit, ndërsa procedurat e mëtejme ligjore do të vazhdojnë në koordinim me autoritetet vendore dhe ndërkombëtare.