Deputeti i Partisë Demokratike të Kosovës (PDK), Ardian Kastrati, ka reaguar ashpër ndaj kryeministrit Albin Kurti, pas deklaratave të këtij të fundit lidhur me situatën në veri të Kosovës dhe pamundësinë e dislokimit të ushtrisë atje.
Në një postim të gjatë në Facebook, Kastrati e ka akuzuar Kurtin për “dorëzim të veriut, Serbisë” dhe për dështim në menaxhimin e ekonomisë dhe sfidave të tjera shtetërore.
“Hashim Thaçi është vet historia e vendit. Historinë nuk mundesh me vjedh o hajn”, ka shkruar Kastrati, duke theksuar kontributin e ish-presidentit Thaçi dhe ish-kryeparlamentarit Kadri Veseli në luftën për lirinë e Kosovës.
Ai e cilësoi Kurtin si “turpin e historisë së re” të Kosovës dhe e akuzoi për bashkëpunim të heshtur me Serbinë.
“Ti në koordinim me Serbinë i ke sjell 300 milionë sanksione Kosovës”, ka shkruar Kastrati, duke e akuzuar më tej për paaftësi dhe korrupsion, me përmendjen e rasteve konkrete si ai i anëtarit të Lëvizjes Vetëvendosje, Naser Hafizi.
Kastrati përfundoi reagimin e tij duke i kujtuar Kurtit se nuk ka arritur të lërë një gjurmë pozitive në historinë e vendit dhe se do të mbahet mend si një figurë e dështuar.