Ministria e Shëndetësisë e paguan rreth 280 për qind më shtrenjtë produktin Paracetamol 1gr për injeksion, në krahasim me vlerën e tregut me pakicë.
Kështu thuhet në njoftimin e Institutit Demokratik të Kosovës (KDI), ku theksohet se ky produkt në tregun me pakicë (barnatoret) në Kosovë, shitet me një çmim rreth një euro për njësi.
“Ministria e Shëndetësisë, përmes Zyrës së Kombeve të Bashkuar për Shërbime të Projekteve, ka kontraktuar blerjen e produktit Paracetamol 1gr për injeksion me çmimin prej 3 euro e 80 cent për njësi”, thuhet në njoftimin e KDI-së.
KDI teksa ka shpërfaqur shqetësimet lidhur me blerjen e medikameneteve me çmime të larta, i ka bërë thirrje MSh-së që të kërkojë llogari nga UNOPS për të njëjtat çmime.
“Po ashtu, kërkojmë nga Zyra Kombëtare e Auditimit, të bëjë një auditim urgjent të performancës së kësaj kontrate ndërmjet Ministrisë së Shëndetësisë dhe UNOPS-it”.
KDI i ka bërë thirrje edhe Kuvendit të Kosovës, Komisionit për Shëndetësi dhe Komisionit për menaxhimin e financave publike që të mbajnë në llogaridhënie MSh-në për shpenzimet enorme të bëra përmes kontratës që MSh-ja ia ka dhënë UNOPS-it për blerjet e produkteve medicinale.