Komisioni Evropian(KE), të mërkurën e 12 tetorit ka rekomanduar që Bosnje dhe Hercegovinës t’i jepet statusi i vendit kandidat për anëtarësim në Bashkimin Evropian(BE).
Komisionari për zgjerim i BE-së, Oliver Varhelyi, tha se vendimi final për këtë vend pritet të merret në muajin dhjetor, raporton Radio Evropa e Lirë.
Varhelyi foli në Komitetin për Punë të Jashtme të Parlamentit Evropian, ku prezantoi paketën vjetore të zgjerimit të BE-së.
Rekomandimi për Bosnjën u tha se është i kushtëzuar, pasi Komisioni pret plotësimin e tetë kushteve specifike që lidhen me miratimin e ligjeve për gjykatat dhe prokurorinë, parandalimin e konfliktit të interesit, lirinë e shprehjes dhe migracionin.
Ndërkaq, mediumi Avaz.ba ka raportuar se Bosnjë e Hercegovinës i janë dhënë tetë kushte që t’i plotësojë deri sa të merret vendimi përfundimtar.