Korporata Energjetike e Kosovës (KEK), ka njoftuar se nga e hëna, 11 maj, nis asfaltimi i aksit rrugor Mirash – Bardh, një projekt që po cilësohet me rëndësi strategjike për operimet e KEK-ut dhe për qytetarët e zonës përreth.
Sipas njoftimit, tashmë kanë përfunduar punimet bazike me zhavorr në këtë aks rrugor me gjatësi rreth 6.3 kilometra, ndërsa faza e asfaltimit do të zhvillohet nga pika e deponisë së mbeturinave në drejtim të Bardhit.
Për shkak të zhvillimit të punimeve, rruga Mirash – Bardh dhe Bardh – Mirash do të jetë e mbyllur për qarkullim për disa ditë, për të gjitha automjetet e KEK-ut, qytetarët dhe autobusët e transportit të punëtorëve, deri në përfundimin e shtrimit të asfaltit.
KEK ka bërë të ditur se qytetarët do të njoftohen me kohë sapo të krijohen kushtet për rikthimin e qarkullimit të sigurt në këtë aks rrugor.
Gjatë kësaj periudhe, pjesëmarrësit në trafik janë udhëzuar të shfrytëzojnë rrugët alternative për të shmangur vonesat dhe për të lehtësuar zhvillimin e punimeve.